- འབའ་རོམ་བཀའ་བརྒྱུད་ཀྱི་ལོ་རྒྱུས་རག་བསྡུས།
- (1) སྟོན་པ་མཆོག་གི་རྟོགས་བརྗོད་ལ། ༡
- (1) སྟོན་པ་མཆོག་གི་རྟོགས་བརྗོད་ལ། ༢
- (2) གྲུབ་ཆེན་ཏཻ་ལོ་པའི་རྣམ་ཐར་ནི།
- (3) པཎ་ཆེན་ནཱ་རོ་པའི་རྣམ་ཐར་ནི། །
- (4) སྐྱེས་མཆོག་མར་པ་ལོ་ཙཱའི་རྣམ་ཐར་ནི། ༢
- (4) སྐྱེས་མཆོག་མར་པ་ལོ་ཙཱའི་རྣམ་ཐར་ནི། ༡
- (5) གྲུབ་ཐོབ་ཀྱི་རྒྱལ་པོ་མི་ལ་རས་པའི་རྣམ་ཐར་ནི། ༢
- (5) གྲུབ་ཐོབ་ཀྱི་རྒྱལ་པོ་མི་ལ་རས་པའི་རྣམ་ཐར་ནི། ༡
- (6) དྭགས་པོ་རིན་པོ་ཆེའི་རྣམ་ཐར་ནི། ༢
- (6) དྭགས་པོ་རིན་པོ་ཆེའི་རྣམ་ཐར་ནི། ༡
- (7) དཔལ་ལྡན་འབའ་རོམ་རིན་པོ་ཆེའི་རྣམ་ཐར། ༣
- (7) དཔལ་ལྡན་འབའ་རོམ་རིན་པོ་ཆེའི་རྣམ་ཐར། ༢
- (7) དཔལ་ལྡན་འབའ་རོམ་རིན་པོ་ཆེའི་རྣམ་ཐར། ༡
- (8) ཏི་ཤྲཱི་རས་པའི་རྣམ་ཐར་མདོར་བསྡུས་ནི།
- (9) རས་པ་དཀར་པོ་སོགས་བླ་མ་བཞིའི་རྣམ་ཐར།
- (10) གསང་བ་ལུས་མེད་རྡོ་རྗེའི་རྣམ་ཐར་ནི།
- (10) ཚངས་གསར་པའི་ལོ་རྒྱུས་བཤད་པ་ལ།
- (11) ནང་ཆེན་པའི་གདུང་བརྒྱུད་དང་གདན་ས།
- (11) རིགས་དབོན་བྱང་ཆུབ་གཞོན་ནུ་ནི།
- (12) རྟེན་འབྲེལ་བཀའ་བབས་བྱང་ཆུབ་མགོན་པོ་ནི།
- (13) རྩ་བའི་གཉིས་པ་ཆོས་སྲིད་ཟུང་འབྲེལ་སྒོ་གྱི་ནས་རྒྱས་པར་བཤད་པ་ལ་གསུམ།
- (14) བྱང་འབའ་རོམ་རི་བོ་ཆེར་དར་མ་དབང་ཕྱུག་གི་དབོན་རྒྱུད་ཁྲི་འཛིན་བྱོན་ཚུལ།
- (15) གཉིས་པ་སྒོམ་སྡེ་ཚང་གསར་པའི་ལོ་རྒྱུས་རྒྱས་པར་བཤད་པ་ལ་གཉིས།
- (16) གསུམ་པ་ནང་ཆེན་པའི་གདུང་བརྒྱུད་དང་གདན་སར་བཞུགས་པའི་རིམ་པ་རྒྱས་པར་བཤད་པ་ལ་གཉིས།
- (17) སྤྱི་དོན་གསུམ་པ་དོན་བརྒྱུད་བྱེ་བྲག་དུ་གྱུར་པའི་གསེར་ཕྲེང་གིས་ཟུར་བརྒྱན་ནས་བཤད་པ་ལ་རི་དགོན་བཅོ་བརྒྱད་དུ་གྲགས་པ་ལས། 1
- སྤྱི་དོན་གསུམ་པ་དོན་བརྒྱུད་བྱེ་བྲག་དུ་གྱུར་པའི་གསེར་ཕྲེང་གིས་ཟུར་བརྒྱན་ནས་བཤད་པ་ལ་རི་དགོན་བཅོ་བརྒྱད་དུ་གྲགས་པ་ལས། 2
(7) དཔལ་ལྡན་འབའ་རོམ་རིན་པོ་ཆེའི་རྣམ་ཐར། ༣
༧ དེ་དང་མི་འདྲ་ང་བླ་མ་མཉེས་པར་བྱས་པ་ཡིན། གདམས་ངག་གི་གནད་ལ་མཁས་པ་ཡིན། སྒྲུབ་པ་རྩེ་གཅིག་ཏུ་ནན་ཏན་བྱས་པ་ཡིན། ཉམས་མྱོང་དང་རྟོགས་པ་ངེས་ཤེས་དང་བཅས་ཐེ་ཚོམ་མི་ཟ་བར་ཡོད་པ་ཡིན། འཆི་ལྟས་ལ་ཤིན་ཏུ་མཁས་པ་ཡིན་པས། དེས་ཕན་པ་མེད། ད་གསོལ་བ་བཏབ་ནས་ཁོང་ལ་ལན་གཅིག་སྡོད་དགོས། མགྲོན་པོ་ཡར་ཚེས་ལ་འོང་བར་སྣང་གསུངས། དེ་ནས་ཞག་དྲུག་བདུན་ནས་སྐུ་བསྙུང༌། ཚེས་གཅིག་དང་གཉིས་ལ་ཇ་པ་སྔ་ཕྱི་ཡང་སླེབས། དེར་བླ་མ་རིན་པོ་ཆེའི་མགྲོན་པོ་ཐག་རིང་ནས་ཡོང་བ་ཡིན་པས་སྤྱན་སྔར་ཐོངས་གསུངས་པ་ལ། མགྲོན་པོས་ཡར་ཞུས་པ། བླ་མ་རིན་པོ་ཆེའི་སྐུ་ཁམས་ཀྱི་བཅའ་རྩི་བགྱིད་པ་གལ་ཆེ་བས། དེ་རེས་ངེད་དང་མི་མཇལ་བས་ཚུར་ལམ་མཇལ་བ་ཞུ་ཟེར་བ་ལ། ཚུར་ལམ་ང་ནི་གར་ཡོད་ཁྱོད་ནི་གར་ཡོད། ཐག་རིང་ནས་འོང་བའི་མི་དཀའ་ལས་མང་པོ་བྱས་པ་ཡིན། མ་འགོག་པར་ཤོག་མཇལ་དགོས་པ་ཡིན། ངས་འབུལ་བའི་ངོ་ལ་བལྟས་པ་མ་ཡིན། ཁོང་རྣམས་དང་འཕྲད་ནས་ད་རེས་ཕྱིས་ལྟ་ཡིན། གཞི་བྱེས་ལ་སོགས་པ་འཛོམས་པ་ཡིན་པས། ད་ཐོངས་དང་ཆོས་ཀྱང་བྱ་དགོས་པ་ཡིན་གསུངས། དེར་མགྲོན་པོ་རྣམས་ལ་སྐྱབས་འགྲོ་དང༌། སེམས་བསྐྱེད་ལ་སོགས་པ་ལེགས་པར་མཛད། དེ་ནས་དགོན་པའི་གྲྭ་པ་རྣམས་དང་མཇལ་ཁ་ལེགས་པར་མཛད་ནས། ཞལ་ཏ་ཡང་ཞིབ་ཏུ་གསུངས། དེ་ནས་ས་ག་ཟླ་བའི་ཡར་ངོའི་ཚེས་གཉིས་ཀྱི་ནུབ་མོའི་ནམ་གུང་ཡོལ་ཙམ་ན་སྐུ་མྱ་ངན་ལས་འདས་པའི་ཚུལ་བསྟན་པ་ཡིན། དེ་དུས་མཐོང་སྣང་ལ་འོད་དམར་པོ་ནམ་མཁའ་ལ་འཁོར་བཞིན་འདུག་པ་དང༌། མེ་ཏོག་སྣ་ཚོགས་ཀྱི་ཆར་དང་རོལ་མོའི་སྒྲ་དཔག་ཏུ་མེད་པ་དང༌། ཁྱད་པར་དུ་ཌཱ་མ་རུ་དང། ཅང་ཏེའུའི་སྒྲ་འཁྲོལ་བ་དང༌། ས་གཡོ་བ་དང་ འུར་ཆེན་པོ་དང༌། འོད་དང༌། འཇའ་དང༌། ལྟས་ཆེན་པོ་དཔག་ཏུ་མེད་པ་དང་ངོ་མཚར་ཆེ་བ་མང་པོ་བྱུང༌། དེ་ནས་ཡར་གྱི་ཚེས་བཅུ་ལ་གདུང་བཞུས། དེའི་དུས་སུ་དུད་པ་ཐད་ཀའི་ནམ་མཁའ་ལ་ཡར་སོང་ནས་འཁྲིགས་པ་ན། འཇའ་ཡི་གདུགས་ཁ་དོག་སྣ་ཚོགས་པར་སོང༌། ནམ་མཁའི་འཇའ་ཚོན་ཀུན། པདྨ་དང༌། ཤིང་ལྗོན་པ་དང༌། རྒྱལ་མཚན་དང༌། བ་དན་ལྟ་བུ་དཔག་ཏུ་མེད་པ་གང་བ་བྱུང༌། འགྲོ་བ་ཀུན་ལ་དང་བ་ཁྱད་པར་ཅན་འདྲེན་པ་དང༌། མོས་གུས་བྱེད་པའི་རྟེན་ལ། རིང་བསྲེལ་ཁ་དོག་སྣ་ཚོགས་པ་མང་པོ་རིན་པོ་ཆེ་འབར་བ་ལྷ་བཟོས་ཇི་ལྟར་བཟོས་པ་དང་ཚོན་རྩིས་བྲིས་པ་ལྟར་ཤིན་ཏུ་གསལ་བ་ངོ་མཚར་ཅན་དང༌། བཀྲ་ཤིས་ཀྱི་རྟགས་རྣམ་པ་བརྒྱད། རྗེ་བཙུན་མའི་སྐུ་ལ་སོགས་པ་རྟེན་མང་པོ་བྱོན་པ་ཡིན་ནོ། །དེ་ལྟ་བུའི་ཆོས་ཀྱི་རྒྱལ་པོ་འགྲོ་བའི་མགོན་པོ་རིན་པོ་ཆེ་དེ་ལ། སློབ་མ་ངོ་མཚར་ཅན་མང་དུ་བཞུགས་ན་ཡང༌། བུ་ཆེན་བཞི་ནི། རྩེ་རོམ་དབང་ཕྱུག་སེང་གེ། བྲན་ཀ་ཇོ་བཙུན་ནམ་མཁའ། བླ་མ་ཆེན་པོ་ལྷོ་པ། སྟོན་པ་རིན་ཆེན་བླ་མ་དང་བཞི་ཡིན། དེ་ལ་ཉེ་བའི་སྲས་བཞི་ནི། བྲན་ཀ་ལྷ་སྟོན། སྟོན་པ་གཞོན་ནུ་གྲགས། ཁྱིམ་མཉེས་ཨཱརྻ་དེ་བ། ལྷ་རྗེ་བློ་གྲོས་མཆོག་དང་བཞི་ཡིན། བརྒྱུད་པ་འཛིན་པའི་སྲས་བཞི་ནི། བླ་མ་རིན་པོ་ཆེ་འབྲི་གུང་པ། བླ་མ་ཉིན་དགོན་པ། བླ་མ་དཔལ་རྒྱལ། བླ་མ་སེང་གེ་རྒྱལ་མཚན་དང་བཞི་ཡིན། ཐུགས་སྲས་གཉིས་ནི། དབོན་སྒོམ་རྒྱལ་བ་གྲགས་པ། དབོན་པོ་ཤེས་རབ་དབང་ཕྱུག་དང་གཉིས་ཡིན་ནོ། །མཆོག་ཏུ་གྱུར་པ་ནི། རྗེ་འགྲོ་བའི་མགོན་པོ་ཏི་ཤྲཱི་ཤེས་རབ་སེང་གེའོ།། །།